Kum Tul Thu (Mangmuhna 20)

Posted Feb 07, 2022 nen Khen Pau A chhungah Prophecy

Tomlakna

I.Thupatna

1.Kum 1000 thu sutdan nampi thum

2.Kum Tuul Thu: Mang 20 bekah om.  Misiangthote Khrish tawh kum 1000 mang, Satan kum 1000 kikhihna, Mimawhte kum 1000 Sihna, kum 1000 khitciang athawhkikna le Satan Kikhahna, Khuapi a umna, Tokhom kaangah Thukhenna, le Thaman piakna ahi hi.

3.Mang 20 pen khen thum in kikhen thei hi: Kum 1000 Kipatna le Kum 1000 sung thupingte, le Kum 1000 Khit Thupiangte ciin khenpi thumin kikhen thei hi.

 

II.Kum Tul Kipatna  le Kum 1000 sunga Thupiangte

20:1-5   Kum 1000 kipatin vantungmi in Tanglai Gulpi, Satan Khih, kum 1000 sung thongkhia,

               Kum 1000 khit ciangin tomkha sung kikhah kik

               Kum 1000 sung misiangthote in Thukhenza ngahin, Khrish tawh Kum 1000 mangkhawm

               Kum 1000 khit mateng A omlai Misite thokiklo

20:6       Thawhkikna masa-a kihelte Misiangtho hi-a, nihna sihna in sukha lo

III.Kum Tul Khit Thupiangte

 

20:7-10 Kum 1000 khit Satan Thong pan kikhahkik.

               Mi Khem dingin Gog le Magog pan mite kaikhawm. Tuipi gei sehnel zah pha-uh

               Kum1000 khit in missiangthote giahphual, ithuai Khuapi ong tuaksuk, Satan  tua Khuapi umcih, Van pan

                  meikuang kia suk.Sapi le Zuauthei Kamsang meili sungah kikhia

20:11-15              Tokhom Kaang ah Thukhenna kipan

               Kum 1000 khitin Asi milian mineu avek un kim. Tuipi in ama sunga misite puak.

               Nuntakna Laibu kihongin, agamtatna bang ciat-un thu kikhen

               Sihna le Sihnagam zong Nihna Sihna ahi Hell ahi meilipi sungah kikhia

               Nuntakna Laibu sunga min omlo khempeuh meilipi sungah kikhia

IV.Thukhupna

 

Thupatna

Kum Tul Tawh kisai Pomzia:

Kum 1000 thu sutzia nampi thum om hi. Tuate in Amillianialsim, Milleniallism. Post-Millenialism cihte ahi uh hi. Millenialism pen Jesus kumkikna hun bulphuhin “Ama” “Khit” cih danin kamal kizang ahi hi. Gentehna in, Jesus kumkik khitciang Millenium(kum 1000) kipan ding acite pen Pre-Millenialism (Kumtulma Jesus kumkik) cihna ahi hi. Amillenialism pen, tulaitak zong Kumtul(Millenium) sunghun hita hi, ci-a upna ahi hi. Hih upna pen Jahovah Witnesses in pom uh hi. Post-Millenium pen kumtul khitciang Jesus nihveina ong pai ding acih upna ahi hi.

Adventist-te Sutdan:

Kum 1000 manna pen Jesus ong kumkik khita kipan hi ding hi. Vantungah misiangthote tawh Khazih in thukhen khawm ading uh hi. Leitung ah ahihleh gupngahlo mawhnei misite  le Satan om ding hi. Kum 1000 khitciangin, Misite thokik, Satan suakta, mihonte khem-in Vantung Pasian kiangpan ong tuaksuk van Jerusalem khuapi umcih ding uh hi. Tualaitak in alian akang tokhum thukhenna om dinga mimawhte le Satan, akipan sapi le zuauthei kamsangte nihvei sihna ahi meilipi ah kihaltum ding hi, ci-in pom uh hi.

Jehovah Witnesses Sutdan:

1914 kuma kipanin Jesus Kumpi suaka, leitung gamte hehin Galpi 1(WW 1) piang hi ci uh hi.Tua huna kipan kum 1000 kipan pah hi, hunte hoihto semsem dinga, vanthak le leithak dinmun in zomto ding hi ci uh hi. Amau pen Amillenialism upna lente kici thei hi.

Evangelical-penticostal lamte sutdan:

Khazih in misiangthote gimna kum sagih tawh akipelh nadingin Secret Rapture(laksimna) ah lasim ding hi. Van meei tung ah Tuuno mopawi kum sagih sung nei ding uh hi. Tu akum sagih sungin leitung ah Anti-Christ 666 ong kilangh ding hi. Rapture khit kum thum le alang gimna khit ciang 666 ong om ding hi. Tua khit kum thum le alang khit ciang meei tunga Tuuno mopawi kham Jesus le misiangthote leitung ong tuak ding uh hi. Tua pen Second Coming hia, Judah-te in leitungbup kumpi sem in kum 1000 man kipatna hi ding hi ci-in pom uh hi. Hih pomzia pen 1914-1918 kikala The Dispensiational Truth agelhpa Clearance Larkin sutzia ahi hi.

Hilhcianna:

Mangmuhna 20 sunga kum 1000 thu pen alian 19 sunga Tuuno mopawi thu azom ahi hi.  Mang 20 sunga thute pen khenpi thum-in kikhen thei hi: Kum 1000 ki[atna thu, kum 1000 sunga thupiangte le Kum 1000 khita thupiangte ahi hi. Kum 1000 akipatna koi ci theih ding cih John in gen cianlo ahihmanin, theihloh thumal khat ong suak hi. Ahizongin Mng 20 sunga John zat kammalte panin kilehzon kik theia, Lai Siangtho munte tawh saikak leng akipatna hunding kithei thei hi.

Kum 1000 sung tawh kisai akihel le agamtang mipawl thum om hi, tuate pen Satan, misiangthote, Pasian le mimawhte ahi uh hi. Pasian thukhenna tawh kisai agenna-ah, Pasian pen Thukhen Mang ahihna pulaak loin, ama nasepte akisem nate genna (passive) dan bekin pulaak hi.

Kum 1000 Kipatna:

Satan Kum 1000 kihen

Mang 20:1-3 Vantungmi khat ong kumsuk in Gulpisiikhiam, tannglai gulpi, ahi Satan in minamte akhem theihloh nadingin mana tawneilo kuampi sungah kum 1000 khat sung khia hi. Kum 1000 acin ciangin tomkha kikhah ding hi. Tawneilo kuampi acih pen Greek pau in “abossos” hia, bangmah omlona leiguak cihna hi. Piancil 1:1-2 sunga, leipiancil meelneilo, awngthawlpi ahihlai dinmun zong abossos ci ahihmanin, kuama omlohna, lim le meel neinawnlo leitung ah kikoih cihna ahi hi.

Jesus nihveina ong kumkik lai-in, misiangtho Khrish sunga site ongtho uha, ahinglaite tawh vankim lai ah lato-in, amah tawh mangkhawm hi(Matt 28:29-33; John 14:1-3; I Kaw 15: 51-55; le 1Thes 4:16-18). Khrish le misiangthote amankhop kipatna pen Khrish in misiangtho alaktoh hun ahi hi.  Tuahun pen Khrish nihveina ahong kum hun ahi hi. Tuamanin Mang 20 sunga misiangthote le Khrish kum 1000 amankhop hun pen Khrish nihveina ahong paia, misiangtho asisa teng phongkikin, ahinglaiteng tawh van akahkhophuna kipan ong suak hi. Leitungah akinusia omlai pen gupna ngahlo teng bek ong suak hi. Tuate nangawn Khrish kumkikna vang in salhlum hi cilailai hi(2Thes 2:8). Avangliatna saphalua ahihmanin leitung le anate tuisuak hi cilai hi. Tua manin leitung ah siluang hawm lomtang le khuapi kicimbang teng bek kinusia ding ong suak hi. Satan le apawlteng zong akhem dinguh mihing omnawnlo-a, mun kisia kawm lahah a om pen tawneilo kuamthukpi abossos (lim le meel neilo) mun ah akikoih acih pen ahi hi. Tua lai ah kum 1000 sawt ding uh hi.

Genphakik lehang, kum 1000 kipatna pen Lai Siangtho enkakin kiseh thei hi. Kum 1000 sung midikte Jesus tawh mangkhawm uh hi(Mang 20:5) ci hi. Jesus le misiangthote kimu-a maankhop hun uh pen Jesus leitungah ong kumkikin, misiangtho sisate athohkik sak khit ciang ahinglaite tawh vankim lai ah alaktoh hun akipan mangkhawm uh hi(1Thes 4:16-17) ci hi.  Tua manin Jesus nihveina ongkumkik hun pen kum 1000 kipatna hun hipah-a, migilote asihlup hun zong hia, leitung hawmsuah hun kipatna le Satan guak omhun kipatna zong ahi hi.

Kum 1000 Sunga thupiangte:

Tomkhom ah Thukhenna

Mang 20:4-5 Tokhom tungah atute in thukhen theihna ngah uh hi, ci hi. Hihte pen Jesus tecipanna le Pasian thu hangin ngawngtan athuak, sapi le a milim bialo, a ciaptehna zong angahlote ahi uh hi. Kum 1000 sung amaute Khrish tawh mangkhawm ta uh ahihmanin, amankhop kipatna uh pen kum 1000 kipat hun akipan ahi hi. Amau tawh mankhop theih nadingin Khrish in amaute avalak hun pen leitungah anihveina avakumkik hun a hi hi. Tua hunin Khrish uma asisate hanpan thokik uh hi. Hih thawhkikna pen thawhkikna masa hia, misiangthote thawhkina hia, hih sunga akihelte thupha ngahte ahi uh hi. Ahangin, nihna sihna in amautungah vangliatna nei nawnlo hi. Nihna sihna pen hell ahi meilipi ahi hi(Mang 20:14-15). Misiangtho thawhkikna pen Jesus nihveina ong kum ciangin, “Khrist sunga site tho masa dinga, ahing lai eite tawh vankim lai ah puaktohna ingah mahbangin, Topa tawh I mang khawnm tawntung ding hi,” Paul in ci hi(1 Thes 4:16-17).

Satan le misite Kum 1000 sung leitung ah

Mang 20:5-6:“A omlai misite in kum 1000 acin matengin atho kei uh hi.” Hih asite pen bang hunin si uh hiam? Jesus ong kumkikna vangin akaplup mimawhte le leipian cil pan asi atholo mi mawh teng ahi hi {2 Thes 2:8; Mang 19:17-18). Kum 1000 sung sicip suak lai uh hi.

Leitung beikuanin leitung ah mihing pawl nih bek oma(Mang 13, 14), tua lakpan misiangthote lah van ah kilato khin, mimawh teng lah sikhin ahihmanin, Satan le avantungmi teng bek om dinguh hi. Amau nasep pen khem ding hia, tu-in mihing om nawnlo ahih manin akhem ding uh omlo hi. Leitung zong Jesus ong kumkikna hulianpi tawh kisia hi(2 Pet 3:9-13; Mang 6:14-17; 16:17-21). Tua pen Mang 20:1-3 in leitung mite akhem theih loh nadingin tawneilo kuampi sungah kum 1000 sung Satan thong ah kikhia aci ahi hi.

Kum 1000 Khit Thupiangte: Misite Tho, Satan Kikhah, Khuapi ong tuaksuk

Mang 20:7-10:  Kum 1000 abei in Satan kikhah ding hi. Leitung kiuli ahi Gog le Magog pan mite kaikhawmin, ithuai khuapi le misiangthote giahphual umcih uh hi. Amaute akisim ciangin tuipi gei sehnel zah pha uh hi.

Akhangkhanga mimawh asiteng ong tho hi, akhem ding mi om ahih manin Satan a akikhah bangin suakta in John in gelh hi. Satan in tuazah apha mitampi amuh ciangin Pasian dopih dingin amlua ahihmanin, dolehang zogawp lelding cin, khem leuleu hi. Tua mihonpite in zong “misiangthote giahphual le a ithuai khuapi” umcih pah uh hi. Tua “misiangthote giahphual” ahi “a it huai khuapi” pen, “Jerusalem khua thak vantung Pasian kiang pan” kum 1000 khita ong kum suk (Mang 21:1-2, 9; 21:2; 3:12)  ahi hi.

Van pan Meikia

Tua bangin khuapi le misiangthote a umcip laitakun, van pan meikuang kiasuk-in amaute valh hi.  Amaute a khem dawimangpa zong sapi le zuauthei kamsang omna meilipi sungah kikhia suk hi. Amaute sun le zan a tawntungin bawlsiatna athuak uh hi. Akicing zawin aneu 11-15 ah agenbehna anuaia bang ahi hi.

Akaang alian Tokhom le Thukhenna

Hih anuaia teng pen Satan le mihonpi in misiangthote le a giahphual( ithuai khuapi) a umcihna le van pan meikuang kia-in amaute avaltum kikala thupiang akicingzaw-a genkikna danin ngaihsut ding ahi hi.

Mang 20:11-15 ”Tua khit ciangin alian akaang tokhom le atunga tupa ka mu hi. Lei le van in ama mai pan ataimanga, omna ding akimu kei hi. Asi alian aneu mite ka mu hi. Laibute kihonga, nuntakna laibu ahi adangkhat zong kihong kamu hi. Asi mite amau gamtatna laibu sungah akiciamteh bangin thu kikhen hi.”

Laibu tawh kisai-in Lai Siangtho sungah, tamveipi kimu thei hi. Jesus in a thungai mite tungah, dawi gilo hawlkhia thei-in nalamdang na bawl theih uh sangin na min uh vantung ah akigelh manin lungdam zaw un, ci ngei hi(Luke 10:20); Pasian in Israel mipite asuksiat sangin ama min nuntakna laibu pan phiat sak zaw dingin Moses in ngen ngei hi(Pai 32:32-33); Daniel in zong thukhenna ah laibute kihong ci hi(Dan 7:9-13); Topa azahtakte kiciaptehna phawkna laibu cih khat om leuleu hi(Mal 3:16); Tua pen ban-ah John in “tuuno nuntakna laibu” acih khat gen hi(Mang 13:8).

Hih atunga munte tawh kizomin atomin genle’ng, Pasian in mikhempeuh omzia ciaptehna neia, athukhen ciangin tua ciaptehna sunga kiciamteh bangin thaman piakik ding cih ong musak hi.

Mang 20:13-15: Mei lipi sungah

“Tuipi in amasunga misite ap hi, sihna le sihnagam (Hades) in zong amasunga misite a ap hi. Amaute agamtatna uh bangin thu akikhen hi. Tua khitin sihna le sihnagam zong meilipi sungah akikhiasuk hi.Hih sihna in nihna sihna ahi hi. Nuntakna laibu sungah amin akigelhlo khempeuh tua meilipi sungah kikhia hi.”

Sihna gam(Hades) acih pen misite tenna gamtuam khat om hi cih genna hilo-in, misite kivuina han pen gam khat tawh kibangin gentehin azat kammal hia, hankhuk/han cihna ahihi. Tuipi le hankhuk in zong amau sunga om misite thukhen theih nadingin apkhia uh hi cihna ahi hi. Akhiatna pen thaman piak nading thukhenna nunung ah apeng le akimangngilh kuamah omlo-a, agamtatna ciat uh zui-in Pasian in thaman piakik ngiatngiat ding cihna ahihi.

Hih thukhenna pen thutuampi khat ong lailut tawh aki bat hangin, aneu 10 na sunga agen meikuang akiatna thu tawh kizomin lak ding hia, akitel zawin agenna ahi hi.

Thukhupna

  1. Mangmuhna 20 ah kum 1000 tawh akizom mihon pawl thum om hi: khatna pen Satan in kum 1000 thongkiatna-in zang hi. Nihna ah, misiangthote in kum 1000 sung Khrist tawh maang khawm uh hi. Athumna: mimawh asite kum 1000 sung tholo hi.

  2. Leitungah mihing omlo, leitung khuapite kisia khin ahihmanin lim le meel neilo awngthawlpi bang ahi hi. Nidanga inn hoih lianpipite, paakhuan hoihnonote Jesus kumkikna in susia khin hi. Tua bang dinmun leitung ah Satan kikoih in mundang pai theilo hi—abossos ah thongkia ci’n kammal zang hi.

  3. Kum 1000 bei ciangin misite tho, misiangtote le khuapi ong tuaksuk, ahihmanin Satan zong akikhah kik ahihi. Mihonpiteng khemin misiangthote giahphual a ithuai khuapi a umcih uh hi.

  4. Tua a umcih laitak-un Tokhom kaang mai-ah thukhenna thuak uha, agamtatna bang ciatun thu kikhen in nihna sihna ahi mei lipi sungah kikhia khin hi.

  5. Hih sungah thukhenna nihvei ong dawk hi—khatpen misiangthote in vantungah kum 1000 sung a(20:4) thukhenna uh hi-a, anihna pen kum 1000 khit ciang meilipi sung den nading thukhenna(20:11-15) ahi hi.

  6. Jesus ong kumkikma-in vantungah Jesus in gup le paih ding, tuu le keel ding, buh le tahum ding, mangbuh le leenggahcilna sungah cil ding(Mang 14:6-12; 14:13-20) akhenna thukhenna khat zong om lai hi. Tua pen Mangmuhna 6 sunga, Ciaptehna 5 na-ah Jesus hanga ngawngtan athuakte nget pen hi-a, (Mang 14:6-12), Kumkikma Thukhenna ahi hi. Avekpi in gawm leng thukhenna thum vei om hi.

  7. Mangmuhna Bu sungah, Thukhenna Thum vei ong dawk hi. Tuate in Jesus kumkikma-in vantungah Jesus bekin khat vei(Mang 14:6-7; 16:5-7; 18:10;) , Jesus kumkik zawh Kum 1000 sungin vantung Tokhom ah Jesus le misiangthote in khat vei(Mang 20:4), le kum 1000 beikhit, akaang alian Tokhom thukhenna ah khatvei (Mang 20:11-15), agawm thumvei ahi uh hi. Anunung pen in mawhna le leitunglui siansuah nading thukhenna ahi hi. Mawhna le mawhphuangpa Satan zong sukmangin omta hi.