Tuuno Mopawi Kum 1000 Thu (Mangmuhna 19)

Tomlakna

Mang 19:1-2:     Gupna pen Pasian sepkhiat hi. Leitung anin sak Numei paktat tunga a thukhenna man hi. Misiangthote sisan phuu lakik ta ahihna (6:9,10)

Mang 19:3       Hallelujah! Meikhu van-ah kah

Mang 19:4       Upa 24 in lasa in anungta Ganhin 4 in Pasian bia in Allelujah ci

Mang 19:5-8   Mihonpi aw bang khat kiza, Vanglian Pasian maang hi, Tuuno Mopawi tungta, Mo zong   kigingsa in om cih gen.Puanpaak kipia

Mang 19:9-10  Tuuno mopawi-a sapte thupha ngah hi

Mang 19:11-14 Van kihong in Sakol kaang tuangpa min Acitak a thuman. Amah in gaaldo in thukhen hi. Amittangte meikuang mitang bang. Apuan ah sisan bang, Amin Pasian Kammal

Mang 19:15  A kam pan namsau tawhminamte sat. Sik ciangkhut tawh uk ding. Leenggah phual amah guak in cil.

Mang 19:16-18  Puantungah “Kumpite Kumpi, tote Topa” cih min kigelh

Mang 19:19-20 Sapi le nalamdang lak in Sapi nambat le milim angah nadingin mikhempeu akhem zuauthei kamsang akam sung pan namsau tawh susia.

Thupatna:

Mangmuhna alian 19 sung in Tuuno ahi Jesus Christ gualzawhna thu ahi hi. Alian 20 sungah Kum 1000 sunga Misiangthote vantunga omzia, Satan thong kikhiatna,  asi mihonte a kum 1000 khitciang athawhkik na, Kum 1000 khit ciangin Satan tomvei sung akikhahkikna, misiangthote giah phual ava umcihin do dingin akipatna, tua laitakin akaang Tokhom ah Pasian in anunung bel thu akhenna le migilo teng kisuksiatna thu ahi hi.

Hilhcianna:

Mang 19:1-4: John in vantung pan mihonpi awtna aw bang awging za hi. Alelujah! Hotkhiatna le vangliatna le minthanna in eite Pasian-a hita hen ci hi. Alelujah pen Hebrew pau in, halelu-Yah hi-a Yah phat un cihna hi.

Banghang hiam cih leh, Ama thukhennate dik-in aman hi; ama paktatna tawh leitung anin sak numeipaktat tungah Ama sawltak asilate’ sisan luanna hangin phula-in thukhen khin hi(Mang 6:9-10 tawh simkak in). Amaute in anihveina Allelujah!, tua numei kihalna meikhu akahto tawntung hi, ci uh hi. Tua laitakin upa 24 le ganhing lite in zong kunin tokhom tunga tu Pasian bia uha, “Amen. Hallelujah!” ci uh hi. Hih ciangciangah Pasian in ahehpihna kong khak khin(Mang 14, 15), gimna nam sagihte zong buakhin ahihna(Mang 16) ong ki dawk hi. Banghang hiam cihleh, atunga Hallelujah acihonpite kammal ah, Pasianin asilate sisan luanna hangin phula kik khin ci hi.

Mang 19:5-10: Tokhom pan aw ging in zong, “Amah akihta Pasian sawltak aneu aliante aw, eite Pasian tungah phatna pia un,” cih mihonpi aw bang khat John in za leuleu hi. Tua khit in, mihonpi aw le tuizeupi ging aw abang le vanging bang aw in, “Hallelujah! Avanglian eite Pasian kumpi-in maang hi, lungdam kipakin Ama tungah minthanna pia ni, banghang hiam cihleh TUUNO MOPAWI atung zo-a, monu  zong akigingsa-in a omzo hi.” Asiangtho saihadial puantual-paak amah zepna-in kinei zo hi. Tua puanpak pen misiangthote dik gamtatna ahi hi, ci hi.

Tuakhitin vantungmi in John kiangah, “Hih thute in adik aman Pasian kammal ahihi, Tuuno mopipawi ah aki samte in thupha ngah uh ahi hi,” ci-in gelh in ci hi. John in amah ahopih vantungmi khe ah bokin biak sawm hi, vantungmi in, amah zong John le Jesus tecipanna alen sanggamte mah tawh akibang lel ahihmanin, Pasian bia zaw dingin John kho hi. Bang hanghiam cihleh, Jesus ading tecipan ding pen kamsang khempeuhte kinna lungsim bulpi ahi hi, ci hi.

Hihmun I etciangin vantungmite nangawn biak ding phalna omlo le biak ding hilo cih ong kidawk hi. Amaute pen thu-um mite gupna ngah nadingin nasem Pasian zat nasemte mah ahi uh hi(Heb 1:9 simkak in).

Hih munah: Tuuno mopawi pen bang ahihiam cih ngaihsut ding ong om hi.

Mang 19:11-16: John in vantung kihong mu-in, a etleh, sakol kang khat mu hi. Atunga tuang mipa pen “Citak in a Thuman” hi-a, amah in dikna tawh thukhenin gaal ado hi, cihi. Citak a thuman cih pen Jesus ahi hi. Amit tang meikuang bang mittang nei hi, alutungah lukhu tampi a om hi, Amah simloh kuamah in atheihloh min anei hi. Amah in sisan baang puantualpi silha, amin in Pasian Kammal ahi hi. Vantung gaalkapte inzong saihadial puanpaak silhin amah azui uh hi. Ama kam sung pan namsau hiam pusuakin, minamte satkhamin, sikciangkhut tawh a ukding hi. Amah guakin vanglian Pasian hehna leenggah cilna acil hi. Apuantungah KUMPITE KUMPI, TOTE TOPA akigelh hi.

Hih atunga thute in Jesus gualzawhna ahang lak hi. Siampi sepna panin thukhen mangpi, gaalzo kumpi hihna ah akikheelta ahi hi. Apuan sisan bang cihpen mawhnei mite adingin sisan tawh gaaldo-a mawhnei mite tatkhiat nadingin leenggah cil bangin gim athuakna, mi giloteng le Satan tawh kido-in a zawhgawpna lak hi. “Pasian Kammal”(the Word of God)cihmin pen Greek-in(Ὁ λόγος τοῦ Θεοῦ)(Ho Logos ton Theos) ahi hi. Jesus pen piansakna khempeuh-ii bulpi le apiangsakpa ahihna, mihing pianzia tawh leitungah ongpai Pasian ahihna lahna thudophah genna ah John in hih kammal zang hi (John 1:1-3). Tua Jesus in nasepna namthum tawh, agualzawhna agen ahi hi: Kamsang bangin amite makaiha Pasian deihna hilhin mawhna atai hi; mawhneite tangin si-in, ama sisan tawh vantung Pasian kiangah siampi semin thumsak hi; tuakhitin kumpi bangin gualzawhna ngah hi.  A nasep namnihte zo khin hi. Tu-in amah in agaal khempeuh akhenuai ah tuancilta hi. Tatkhiatna le thumsakna tawh leitungbuppi Satan khutsung pan lakhia khinta ahihmanin Kumpite Kumpipa hita hi. (James Strong, The Exhausive Concordance of the Bible: Together with Dictionaries of the Hebrew and Greek Words of the Original, with References to the English Words, McLean, Virginia: Mac Donald Publishng, nd. Sv. “3056  Word”)

Mang 19:17-Vantungmi khat ni tungah dinga, “Hong pai un, Pasian nitak ankuang um un,” ci’n vana leeng vasate kumpite, gaalkap mangliante, mi thahat, sakol le atuangte, toneilo le silat alian aneute sa ne dingin sapna aw John in za hi. Tua laitakin sapi le leitung kumpite le agaalkapte uh’n, sakol tuangpa(Jesus) le agaalkapte do dingin kikhawm uh hi. Tuabang laitakin sapi le sapi mai-ah nalamdangte lakin, sapi milim biasak dingin leitung khempeuh khem zuauthei kamsang kiman hi; amaute gel ahingtangin meilipi sungah kikhia hi(Mang 20:14-15). Tualo adangte ahihleh sakol tuangpa kamsung pan apusuak namsau tawh thahna thuakuha, vasate in amaute sa khamtakin nephitphet uh hi—tua pen Pasian vumkhawl-an ci hi(Mang 19:17)

Thukhupna:

1. Mangmuhna 19 pen Tuuno Mopawi ahi hi. Tuuno mopawi in thu nih nei hi. Akhatna pen, tuuno in mo ahi misiangthote le Jerusalem khuathak pen amah tawh omkhawm thei dingin a lakna ahi hi—tua pen Tuuno mopawi ahi hi(Mang 19:7-9; 20:2-3;21:9-10 simkak in). Athu nihnapen, Tuuno in Agaalteng (sapi, zuauthei kamsang le mimawhte langpan nateng)zo in atuatcilna ahi hi. Jesus in agaalteng susia-in asa-uh vasate in gilvahtakin ne-uh hi(Mang 19:17-18).Tua pen Pasian vumkhawl an, zan-an ci hi(Mang 1917-18).
2. Jesus in Pa vangliatna tawh meilon tuangin ong kumsuk ciangin, amisiangthote la dinga, vantungah ciahpih ding hi(Matt 24:29-31; John 14:1-3; 1Thes 4:16-17). Migilote ahihleh gimna nam sagih thuak dinguha, tua asagihna ah, Jesus vangliatna tawh Jesus ong kum amittanguh tawh mu ding uh hi, mualte tungah avuklum dingin kiko dinguh hi, nihveina ong kumkikna vangliatna in amaute kaplum ding uh hi(Matt 26:64; Mang 1:7; 2 Thes 2:8; Mang 19:17-18). Tuuno mopawi kipat nadinga thupiangte ahi hi.
3. Tuuno mopawi pen bangtan sawt ding cih Mang 19 sungah genna omlo hi. Futuristic-Dispensationalism apomte in misiangtho guksim (secret rapture) panin kipan dinga, gimna lianpi kum sagih sungteng Tuuno mopawi meilom tungah om ding hi, ci uh hi. Hih hilhna pen Mangmuhna 19 le Lai Siangtho tawh zong kituak lo hi.